Joey's Food and Beauty Diary❤️: 2015

2015年12月31日星期四

[飲食] 除夕夜溫馨晚餐*

是日除夕夜，周圍都full booking，唔想排隊等食就搵下d另類d既cafe

Bondi位於荔枝角既工廈區，一出地鐵見個個都趕住放工，以為上到去冇咩人食，點知原來都幾受歡迎，走既時候直頭全場爆滿

店面都幾大，好多座位，裝修好簡潔，有聖誕樹裝飾，牆上仲有好可愛既樹熊，每張枱都有杯燭光，暗暗既燈光令到成餐飯好似燭光晚餐好有情調。

menu選擇都幾多，唔知點揀既可以揀二人餐。

南瓜湯

南瓜湯面頭有幾粒蒜蓉包，幾香富有牛油香味，而且脆脆地，湯不算太濃，口感黏黏，有淡淡既南瓜味，配上麵包吃係一個好好既開胃菜

麵包新鮮焗出，外脆內軟，面頭有少許穀物，點上附送既黑醋令麵包更惹味

前菜抹茶呑拿魚沙律

食唔到抹茶味，不過呑拿魚口感軟滑，幾特別既沙律

帶子龍蝦汁大蝦意大利飯

帶子好大粒，食落好新鮮爽口，大蝦整得脆卜卜，蝦肉亦都彈牙，龍蝦汁味道咸咸地，意大利飯係比較硬身嗰種，比較濕，幾有意大利風味。

原隻燒春雞配燒汁

除夕夜戴上手套分享燒春雞，都幾開心，雞肉嫩滑，燒得啱啱好，雞皮少少脆，點埋燒汁味道更出。另伴有薯蓉同火箭菜。

餐飲揀左有機茶Bombay chai

飲落有少少似Earl Grey..又有少少似功夫茶，甜甜地，幾特別下

Brownie with ice cream

賣相好靚，碟邊用朱古力畫得好吸引，熱辣辣既Brownie同凍冰冰既雪糕成一個對比，brownie朱古力味濃郁

朱古力心太軟

心太軟製作需時，出黎效果都好滿意，外層脆脆，入面流心，暖暖既朱古力同軟滑既蛋糕食得好滋味。

重點喺呢度d雪糕全部都係movenpick 😍 高質素雪糕配甜品令人更加開心

2015年最後一餐晚餐，食完好滿足，返屋企打食評倒數，送大家happy new year!!

Bondi
荔枝角長沙灣道883號億利工業中心203室

2015年12月30日星期三

[飲食] Pizza樂*

長沙灣咁多商業大廈，要搵個地方靜靜地食lunch真係唔容易，今日比我搵到呢間小店，細細地大概15張枱倒，唔太多人夠哂relax

Set lunch由$98-$118

我同朋友揀左slice of pizza 同黑松露野菌意粉

先黎餐湯: 南瓜湯，味道濃郁，湯結結地好多蓉，湯面有數粒麵包粒，外面淋內面脆，店員亦主動幫忙添加胡椒，令湯更惹味。

黑松露野菌意粉

一黎到已經遠遠都聞到陣黑松露味，野菌亦都好多，每啖意粉都食到野菌，黑松露白汁好creamy，意粉可以揀傳統硬身或者軟身，我揀左後者，揀得好啱，軟硬度正合我意。

Pizza揀左Margherita 同埋辣肉腸

PIzza係木板上，好大片，好抵食，呢個set仲大過一般既細批，要兩個人share先得。Margherita係蕃茄+芝士，芝士味不算太濃，同蕃茄混合味道幾好。辣肉腸味道好濃，就咁食會有少少咸，連餅皮食，再加d芝士粉就啱啱好。整體pizza都好好吃，餅皮亦又脆+煙韌。

+$15可配粗薯條，薯條好粗好大條，新鮮熱辣炸出黎，食落好香薯味

另配有蕃茄醬可以點，唔係一般既茄汁，係有鮮茄喺入面，令到成個薯條變得更新鮮。

意大利雲呑 $68

雲吞皮有點厚，不過咬落口好大陣芝士味，入面d餡好軟滑，令我食返意大利的感覺。

凍飲+$8 不過我揀左熱茶 Chamomile Citrus唔洗加$，係有機茶，清清pizza既肥膩不錯。

店員服務態度親切，加水都加得好密。

有點失望係想點嗰樣冇嗰樣..肉醬千層麵同意式肉丸賣哂，方形pizza冇哂變左圓形....連最後想點焦糖燉蛋都賣哂，店員明明叫我唔好咁快點甜品住😭😭

可能繁忙時間d野去得太快，建議想叫乜有乜都係12點好去食喇，不過食物質素都ok滿意，算啦😊 下次唯有早d去試返

Pizza Piazza
荔枝角長沙灣道883號億利工業中心地下1A室

2015年12月29日星期二

[飲食] 聖誕飽滿沖繩之夜

聖誕節同一大班朋友出去食大餐，大家都想食日本野，見度度都full booking 點知鳴門咁啱有位，所以喺度食左我地既聖誕大餐。

鳴門裝修格局同一般居酒屋差唔多，入面好舒服，靜靜地好啱傾計，比較特別既係佢收銀機旁放左好多大大條既日本魚同扇貝

睇下個menu..價錢都好親民，有d套餐都幾抵食下，不過朋友想試新野，所以冇叫飯既套餐。喺一月尾之前，清酒同部份食物(刺身)有半價優惠，星期六日都有，幾吸引wor

鱆紅魚和風沙律

鱆紅魚和風沙律

鱆紅魚軟滑，沙律汁係類似泰式沙律既味道，酸酸辣辣很醒胃，係一道好開胃既前菜。

沖繩花生豆腐，自家制櫻蝦蟹肉玉子燒，枝豆，沖繩腐乳，

沖繩花生豆腐

係我食過最特別既一款豆腐，平時d豆腐一篤就會裂開，但呢種沖繩豆腐好似芝士咁，可以拉絲，入口綿綿口感都好似芝士，夾雜住花生既甜味好特別，有d似食緊甜品。

自家制櫻蝦蟹肉玉子燒

玉子燒中間有一隻隻櫻花蝦，蛋既甜味同櫻花蝦味道配合得好好，玉子亦燒得很滑。

枝豆

呢度枝豆好好食，因為出面唔係間間都整得好味，呢度整得咸咸地，入面粒豆唔會淋身好有口感。

沖繩腐乳

又係一種好特別既食品，入口冇腐乳味，竟然係好濃酒精味，店員話呢種係發酵味，食品係完全冇酒精，大家都覺得好神奇，不過呢種味道唔係人人都啱，我自己唔飲酒所以麻麻地呢個味道。

刺身併盤

刺身併盤內有粒貝，伊佐木，油甘魚腩，三文魚同甜蝦。

除左壽司豉油外，另配有酸汁可以點白魚。

粒貝好爽口，香甜好滋味。伊佐木有好多片，淡粉紅色，入口少許煙韌，淡淡既魚味帶點鮮甜。三文魚厚切好新鮮，入口即溶，富有魚香味，油甘魚油脂分佈均勻，好肥美，甜蝦好大隻creamy

刺身真的超鑽，可以比滿分👍🏻

鳴門壽司拼盤

鳴門壽司拼盤

又係另一個好吸引既主菜，壽司採用左非一般既魚，我自己就試左拖羅卷，牡丹蝦，池魚王同金目鯛，

拖羅卷入面拖羅啖啖肉，好夠味，牡丹蝦好大隻，肉質黏黏好新鮮，最令我難忘係金目鯛，因為係第一次食呢種眼仔大大既魚，味道除左鮮之外仲好特別，富有魚香味。

煎沖繩黑豚餃子

煎沖繩黑豚餃子

餃子係來自沖繩，原汁原味，外層煎得金黃香脆，餃子皮比較厚，如果薄d應該會好食d。

沖繩水雲天婦羅

沖繩水雲天婦羅

我地叫佢水雲小丸子，水雲係一種沖繩既植物，樣貌好似海草，同小丸子一齊炸，黑色一粒粒都幾特別，入口香脆可口，外脆內軟。

清酒煮日本大蜆

清酒煮日本大蜆

叫得大蜆真係大大粒，食到有鮮味，清酒酒味不算好濃，好易入口，同蜆肉汁混合變左甜甜地既湯。

石鍋博多湯豬軟骨烏冬

石鍋博多湯豬軟骨烏冬

一上枱都仲係滾住熱辣辣，烏冬煮得夠彈牙，入口滑溜，豬軟骨份量好多，好juicy

明太子雞翼串燒，美國牛肋筋串燒，美國牛舌串燒

明太子雞翼串燒

明太子包喺無骨雞翼入面，一咬落去，好多雪魚魚春流出，辣辣地好惹味。

美國牛肋筋串燒，美國牛舌串燒

串燒燒得香口惹味，牛舌有咬口，味道偏咸了一點，牛肋筋帶少許肥膏，好香口，牛味濃郁。

日本磯燒番薯串燒

第一次食細細粒番薯，燒得啱啱好，番薯淋身入口軟綿綿，細細粒好易入口，番薯味道同上面灑既鹽都好配合。