Google+ Followers

2016年8月23日 星期二

[美容療程] 激光脫毛初體驗@Time Traveller

之前喺Facebook度玩遊戲抽奬,意外地中咗二奬,奬品係免費激光脫毛三次,本身自己屬於小毛人士,而underarm好耐之前已經join咗彩光脫左,不過又未試過激光脫毛,就膽粗粗去試吓。

送嘅脫毛就係呢間Time Traveller,中文名叫時間光學中心。 店舖嘅地理環境都幾好,就係往新港中心嗰條路,九龍公園對面。



一去到店員就好熱情地介紹自己,之後就帶咗我入房,原來免費激光脫毛得上唇、前臂同underarm三揀二,我本身underarm都冇毛,所以就揀咗上唇同前臂。



其實我前臂都係冇乜毛,得啲好幼同無色嘅毛,不過都即管試試。 做嘅時候完全唔痛,只係有被吸啜嘅感覺,其實幾舒服添。



呢部機嘅賣點係真空療頭,脫毛嘅時候會用真空技術將皮膚吸入療頭,而真空嘅壓力會令皮膚暫時被拉薄,從而減低灼痛感及灼傷機會。另外吸起仲可以令毛囊更接近激光源,令過程更加徹底。 之後再脫唇毛,係用另一個冷凍療頭,涼涼地令到過程冇咁熱,做嘅時候牙肉都會覺得有少少慶,不過個過程都幾快,做完摸落去真係滑左。

可能本身我唔太多毛,所以做前做後分別唔大,亦都影唔到相俾大家睇😅。


店內環境其實幾靚,做完療程仲可以用佢哋嘅化妝品化埋妝先走,而嗰度嘅化妝品全部都係名牌子嘅。 之後再去過兩次,店員都好主動WhatsApp我預約時間,頭兩次去完全無sell,仲送咗個皮膚分析同彩光去斑俾我,同埋幾包cream試用裝俾我。 終於做完第三次,脫毛師都有sell一兩句,叫我join多三次唇毛,可以包保冇晒,不過我唇毛其實好少,佢見我話唔洗,都冇再堅持落去。


臨走時俾另一個女既美容師帶左入房又再做皮膚分析,分析返上次彩光去斑個效果,老實講我唔太覺得有好大分別,做完彩光雖然有甩皮,但又唔覺啲斑淡咗。 呢個美容師都幾hardsell,因為我話自己不嬲有做開激光去斑,而且有效果,佢就不停sell我激光好痛,應該試吓佢哋嘅療程。 其實貪靚嘅女仔係唔會怕痛,最怕就係join咗無效😂😂,所以我當然繼續選擇激光去斑,冇join到,傾咗大概10分鐘倒就走到,幸好店員冇黑面。 雖然我冇幫襯,隔咗幾日之後佢哋仲有whatapp我,提醒我脫毛後要保濕,仍然好貼心,所以overall我對呢間店嘅感覺都係唔錯嘅。 P.S. 有個男店員都幾溫柔,仲俾咗適合我皮膚嘅保濕霜我用,係佢哋自己嘅lab研製出黎既。